يوم صافي0000000000

يا كل بحور الشعر ويّا شطآنه .. يا أبيات يا قوافي
تعالوا هنا وساعدوني .. دانا نفسي أحلم بيوم صافي
-*-*-**-*-*-*-*-*-*-*-*-
لا حقيقة ولا واقع .. دا مجرد حلم .. مره ويعدي
يريح بالي وتبتسمله روحي ...... صغير على قدي
أعيش لحظاته وأنا مش عارف ... إنه حلمي الوردي
وأطير معاه في خيالي ويرجع لقلبي خضاره ويتعافي
دانا بس نفسي أحلم بيوم صافي ....
-*-*-**-*-*-*-*-*-*-*-*-
أنا غلبت سلطان النوم .. وبقيت أحلم ..وأنا صاحي
فاتح عينيا ومش شايف غير البكا .. نسيتني أفراحي
ماعدش فاضل فيها غير خيالات ...بترقص ويّا أشباحي
وأرواح كتيرة فارقت أحبابها حزنانة .. بتبعد وبتجافي
وبرضه لسة نفسي أحلم بيوم صافي ..
-*-*-**-*-*-*-*-*-*-*-*-
أنا لم كنت يوم بعيد .. عن جداول وينابيع العاشقين
كنت باشرب من صفا ميّتهم وأرتوي بإيدي اليمين
وأشرب تاني زي اللي في صحاري الحب محرومين
وأملا من جدولي وأفرق على الكل من حمل كتافي
أيوه .. نفسي أحلم بيوم صافي ....
-*-*-**-*-*-*-*-*-*-*-*-
يوم شمسه تدفي برد القلوب
ونسايمه تحي أملي المغلوب
ونرجع نغني في كل الدروب
غناوي فرحة لقا المحبوب
وترتاحي ياعين ولا تخافي
أنا ناوي أحلم بيوم صافي
-*-*-**-*-*-*-*-*-*-*-*-
راح أسيب سلطان النوم يغلبني
بعد ماشرط عليه لازم يقلّبني
على نسايم وسحابة حلمي الوردي
تاخدني .... ويفضل معايا مايسيبني
إلا ما يرجع من تاني قلبي متعافي
ويحلم وأحلم معاه .. بيوم صافي ...