ديوان "بعيد عن ضلمة العالم ،، بقلــم / (فؤاد66 ) " عـامّي

بعيد عن ضلمة العالم


فى قلب النور أنام وأصحى

وبرضه الصوره مش واضحه

تشق عيونى قلب الليل

تدور عن شعاع فرحه

بعيد عن ضلمة العالم

بفتش عن بواقى الحلم

دروب العتمه تسرقنى

تضيع عمرى ظلم فْ ظلم

وفى السكه ..

لقيت الأرض بتلملم خضار توبها

وفوق التوب لقيت بصمة إيدين جارحه

سنابل قمح مش طارحه

وجوا الهيش كلاب سارحه

تفتش عن بواقى الحلم

تقطع لحمنا الميت

وتنهش فينا ظلم فى ظلم

***

ولسه العتمه واخدانى

وبين الحيره والتوهه

خطاوى الضلمه معتوهه

ولا بتخلص يا مشوارنا

ولا بنخطى أسوارنا

ولو نلمح طريق راحه

نلاقى السكه مشبوهه

ونرجع نمشى فى العتمه

ونفس الحلم هو الحلم

تضيع منا سنين تانى

يشيب العمر ظلم فى ظلم

***

لمحت شعاع بيتسرسب

مشيت وياه ..

لقيت مركب

فى قلب البحر

فاردالى قلوع الحلم

بتْصَفَّر خلاص ماشيه

وبتودع موانى الظلم

نسيت نفسى

رميت نفسى

لقيت نفسى

فى حضن البحر

وصوت الغربه جوايا

بيصرخ .. يبكى ويايا

سنين العمر

وابص ورايا واتحسر

على العمر إللى متكسر

على الحلم إللى عشته سنين

ولا إتحقق ولا إتفسر

وقلت انسى

لقيت فجأه إيدين أقسى

بترمينى فى قلب البحر

أصارع موج واحارب صخر

ولسه كتير على المرسى

قالولى لو وصلت لشط

" لو يعنى "

محدش مننا قابلك ولا شافك

وإيدك هى مجدافك

وخد حلمك على كتافك

ضربت البحر

بس البحر كان قاسى

كسر إيدى

ندهت بعزم أنفاسى

خنق صوتى

حضنت الروح بإحساسى

سحب روحى

ونبض الحلم بيعافر

ومش قادر

وسلِّمنا

ومات حلمى .. ومُت أنا فيه

وبغرق بس عينى عليه

وسامع صوت بيندهنى ..

بعيد لكن كإنه قريب

أنا عارفُه

ده صوت أمى

على روحى بيتشاهد

وبيسَمِّى

وبيبارك نزيف دمى

وصوتها يبقى آخر صوت

وبعده سكوت ....!
بحبك يا مصر


بَحِبِّكْ يا مصرْ ..


وبعشقْ ترابكْ .


وألِفْ المداينْ ..


وأرْجعْ لبابِكْ .


وأحِسْ بكيانى ..


وكرامتى فْ رحابِكْ .


يقولوا فقيره ..


يقولوا أسيره ..


بشوفِكْ أميره ..


وأحبِّكْ يا مصرْ .




بحبِّكْ ملايه .. ومنديلْ بِقُويا .


مقالبْ من أختى .. وشقاوه مْنْ أخويا .


ودعوه مِنْ أمى .. تنسينى همِّى ..


وحِكْمَه مْنْ أبويا.


وأحبِّكْ صبيِّه .. على البحرْ جايَّه ..


فى ساعةْ عصَارى .


ونسمه قُبَالْها .. تطيَّرْ فى شالْها ..


تبَيِّنْ جمالها .. وتِرجعْ تدارى .


وأحبِّكْ مراكبْ .. تعدِّى إللِّى راكبْ ..


لبرْ الأمانْ .


يدوبْ جوَّا نيلكْ .. ويعطشْ يجيلكْ ..


يقوللِّكْ كمانْ .




وأقابلِكْ ببُوسه .. فى زفِّةْ عروسه ..


ولَمَّه فى بيتنا ..


مع ولادْ حارتْنا ..


تدُقْ المزاهرْ .. ترُدْ المزامرْ ..


تزَغْردْ جارتْنا .


نهلِّلْ .. نغنى ..


وحلمْ التمنِّى ..


ينورْ ليليتنا .


وأحبِّك زياره لبيتْ عمْ سيدْ ..


ده أصله فقير مِشْ حيقْدرْ يعَيِّدْ ..


نعَيِّدْ عليه .. نفرَّحْ عنِيهْ ..


ويدعيلْنا دعوه بمليونْ جنيه .




فى أرضِكْ يحِسْ الغريبْ إنُّه مصرى ..


وإحنا الأجانبْ .


ويلْقَى الرعايهْ .. ويلْقَى الحمايهْ ..


على كلْ جانبْ .


ويمشى ف ربوعِكْ .. ويشبعْ بجوعِكْ ..


ويعملْ مصايبْ .


ويرحلْ وينسى .. جِميلِكْ ويقْسَى ..


ويطْلَعْ يعايبْ .


ويرْجعْ تسامْحى .. يا ساكنه فْ ملامحى ..


يا سِتْ الحبايبْ .




ولادِكْ بَنُوكى .. بروحْهُمْ فَدُوكى ..


ويِشْهدْ عليهمْ ترابكْ فى سينا .


ومنهُمْ با عوكى .. عشانْ الشِيروكِى ..


وفيللَّا فْ مارينا .


يعيشوا فى خيرِكْ .. ويدُّوهْ لغيركْ ..


ولادْ اللَّذِينا .


ولوْ جارْ زمانْهمْ .. يعودُوا لْمكانهمْ ..


يلاقوا السَكينَهْ .


وتِنْسِى جحودْهمْ .. وتبكى عليهمْ ..


عنيكى الحزينهْ .




فى أرضكْ سرَحْتْ .. فشَلْتْ ونَجَحْتْ ..


وعشْتْ بْبساطَهْ .


صاحِبتْ الحمَامْ .. ونِمْتْ فْ سلامْ ..


ولوَْ عَ البلاطهْ .


تِغَيَّرْ فى شَكلى ..همومى ومشَاكْلى ..


لكِنْ روحى لأْ .


أعَبَّرْ بغنْوهْ .. وأقولْ نُكتهْ حلوهْ ..


لكِنْ يأسْ لأْ .


ما طيقْشْ الغَتاتهْ ..


وقلبى المسالمْ ما يعرفْ شّماتهْ ..


وأقولْ بالتلاتهْ ..


بحبِّكْ .. بحبِّكْ .. بحبِّكْ .. يا مصرْ

دموع حبيبتى


نداوى جرح مين فينا .. ؟

بقينا إتنينْ بدل واحدْ

شكينا لبعض وحكينا

وجمَّعنا طريق واحدْ

ولا جراحنا إنتهت فينا

ولا جرحى فٍضٍلْ واحدْ

لقيتٍكْ فى الطريق دَمْعه

بتبكى عمرها المجروحْ

مِشٍيتْ خطوه لكنْ قلبى

ماهانشْ علٍيه يغيب ويروحْ

رٍجٍعْتْ الخطوه من تانى

نسيت دمعى وأحزانى

ولملمتك وَنَا المدبوحْ

سألتٍكْ عن سبب جرحٍكْ

حبيب قاسى قتل فرْحٍكْ

هجر أرضٍكْ .. حَرَقْ قمحٍكْ

وباع نفْسُه فى يوم واحدْ

بتبكى عليه ..

ودمعك فوق خدودك نهرْ

طوله قد طول الدهرْ

بينادى فى ليل القَهْرْ

على أحمُسْ .. على مينا

وناسْ كانوا فى وادينا

أسود تٍرْهٍبْ أعادينا

وفى إْديهم يلين الصخْرْ

بنوا بالعلم أمجادهمْ

وسابوا تاريخ لأحفادهمْ

دليل يشهد على جهادهمْ

وإن الكلْ كان واحدْ

ولسَّه النهرْ ..

بينادى فى ليلْ القهرْ ..

فين ناسى .. ؟

سابونى للعدو القاسى

يحُط الطين على راسى

يعربد جوا أنفاسى

يزيٍّف حتى كُرَّاسى

ويجرح نبض إحساسى

ولا منهم نَطَقْ واحدْ

ولا فارس حَمَل سيفُه

ولا عالٍمْ لمَعْ طيفُه

وكله بيجرى ورا كيفُه

وده شيشَه وده سْجاره

وده مَرْمٍى فى خمَّاره

وده بيزحفْ ورا إْثاره

وضاع الحلم يا خساره

ماعادْ فينا أسدْ واحدْ

ولا حتى جدَعْ واحدْ

ولا حتى أملْ واحدْ

بقينا الكلْ مٍشْ واحدْ

ولسَّه النهرْ

بينادى فى ليلْ القهرْ

على أحمُسْ .. على مينا

ولا جراحْنا انتهتْ فينا

ولا جرحى فٍضٍلْ واحدْ
غروب شمس

شمس الغروب
كانت يادوب
متعلقه فْ طرف النهار
متشربه بلون الحَمَار
بتسلم الليل إللى زاحف
يوم جديد من عمرنا
وكإننا ..
حِسبة سنين
تخلص ونخْلص
كل يوم العد ينقص
واحنا رهن الإنتظار
كلنا واخدين قرار
إننا نفضل مكانَّنا
ملفوفين جوا الستار
نمضغ الصبر بمرار
والحمام رمز السلام
للزتون نرسم غصون
والحروب حوالينا نار
للكبير لازم نطاطى
حتى لو كان مش أمين
صوتنا لازم يبقى واطى
وإن علا يهتف ل " س "
أصل إحنا مؤدبين
ع السكوت متدربين
والكلام ماتت حروفه
واللسان معقود بخوفه
وإن نطق بيقول آمين
حتى انا إتكلمت غلطهْ
هزنى جو الغروب
لما شفت الشمس بتسلم نهار عمرى
لليل زاحف سواده ع الدروب
هى دى كل الحكايه
والبدايه بترتعش من خوفها
قدام النهايه كلام عادى


ياريت نقعد ونتكلم على الهادى


بدون تزييفْ


كلام عادى ..


بسيط جدا


مفيش تكليفْ


كلام كان ابويا قالهولى


وقاللى اقوله لولادى


ياريت نقعد ونتكلم على الهادى


حصيره فْ أرض تجمعنا ..


وطبليَّه..


وحبِّةْ ملح . ونسمِّى


ونقسم ويَّا بعض رغيفْ


ونحمد ربنا ونشكر


يبارك لينا فى اللقمه وصحتنا


ويبعد عننا أمراض


تموتنا


إذا كلنا السيمون والبيفْ


كلام كان ابويا قالهولى


زمان كنا بنقعد تحت شجرايهْ


ونتمدد فى ضلايهْ


ونتسامر .. ونتساهر ..


ومن حدوته لحكايهْ


لا سَخنَّا الهوا مرهْ


ولا بَرَدْنَا


دى نسمه من هوا بلادنا


دى أجدع من مِتين تكييفْ


تعالوا نقول ونتكلم على الهادى


كلام كان ابويا قالهولى


وقاللى أقوله لولادى


انا مش ضد مدنيَّه وتكنولوجى


ولا ضد إننا نسمى علوم النفس سيكولوجى


ولا حتى انِّنا ندَّلع زكيه نقولَّلها كوكى


ولا نرطن فرنساوى وأمرُوكى


لكِين ضد إنى أتكلم كما الخواجاتْ


وأغزل من لسانى لغاتْ


وانا أصلا فى لغتى ضعيفْ


كلام عادى


بسيط جدا


مفيش تكليفْ


زمان كان الكبير له هيبه فى الحارهْ


وكنا بنحترم جارنا ..


وبندافع عن الجارهْ


وكانت بنت حتتنا


أمانه تلِف رقبتنا


ولو فاتت على بيتنا


عنينا تغوص فى سابع أرضْ


شهامه ونخوه وبنعرف نصون العرضْ


وحتى الحب ..


حتى الحب كان صافى


برىء .. طيب .. رقيق .. دافى


وكلمة حب كاتْ صعبهْ


لاهى نزوهْ .. ولا لعبهْ


ومش سهل انِّنا نقولها


ولا كان سهل نسمعها


لإن الحب كان مبدأ


وكان صادق وغرضه شريفْ


ماكانش كلام جميل معسولْ


وشرحه يطولْ


وجوَّا القلب كدب وزيفْ


ولسه أبويا صوته فْ قلبى بينادى


بيتكلم كلام عادى



يقول والدى :


زمانَّا برضه كان ماشى بقانون غابهْ


وكنا كلنا غلابهْ


بنشبع جوعْ


وبنصبَّر عطشنا دموعْ


ونغزل والكبير يلبس تِياب التِّيهْ


ونزرع روم ويسْكَر بيهْ


وحتى النخل ..


كان يُصْلُب ضلوعنا عليهْ


لكين عمره ما طوِّل يوم فى وسطينا


تِعِبْ هوَّ..


ولا تعبنا .. ولا وْطينا


ده إحنا الى أكلنا الطمى ويا الخضره والطينهْ


زمان كنا بنتوحد فى وقت الجدْ


ولو قمنا ماكان يقدر يصدنا حدْ


تشوفنا تقول مافينا ضعيفْ


فى وقت الحرب نمسك سيفْ


ووقت الكرب دم خفيفْ


ويوم الجدب ..


بنسمى ..


ونقسم وَّيا بعض رغيفْ

مدرسة العصافير


عصافيييير صفا

عصافيييير إنتباه

تحية العلم


النشيد القومى بصوت عالى

مع بعض ..

واحد .. إتنين .. تلاته

صوصوصو ... صوصوصو ...

إحنا طيور مش عالم سو

ولا بنجرح .... ولا بنخون

ولا فيه عشره علينا تهون

ولا بتفرق بيننا ظنون

ولا بيأثر فينا الجو


صوصوصو ...صوصوصو ...

إحنا طيور مش عالم سو

لينا مبادىء وبنحميها

وسمانا بدمنا نفديها

لو يوم صقر يقرب ليها

نهجم ولا إعصار ولا نو


صوصوصو ... صوصوصو ...

إحنا طيور مش عالم سو

رأينا دايما من تفكيرنا

عمرنا يوم ما خضعنا لغيرنا

لو واحد يحكم فى مصيرنا

غير ربنا نرفضه فى التو


صوصوصو ..صوصوصو ..

إحنا طيور مش عالم سو

علشان جوا قلوبنا الخير

تلقى الرزق معانا كتير

عمرنا ما استنينا الغير

يدينا ويحسن .. وده لو


صوصوصو ... صوصوصو ...

إحنا طيور مش عالم سو

عايشين فى وطننا بحريه

وحدودنا الأمه العربيه

لو تتعلموا منا شويه

الدنيا ف عينكوا حتحلو


صوصوصو ... صوصوصو ...

إحنا طيور مش عالم سو

قتلوا ولادكو جريح وأسير

سكنوا مكانكو مفيش تأثير

مانتو آخركو حمام وسرير

آه يا ولاد الهو . هو . هو

إنتم مين ..؟ ولفين رايحين ..؟

وإيش وصلكوا لدولة صو ..؟

نورس حزين



رجع الشتا ..


واسكندريه فى الشتا


نورس حزين


فارد جناحه ع المدى ..


يحرس قلوع الصيادين


صوته بطعم الجرح ..


طعم الملح ..


تصرخ أنِّته ..


تلمس قلوب المجروحين


والموج دموع الحزن ..


تبكيها الليالى والسنين


ع التعبانين ..


الشقيانين ..


الغرقانين ..


ع اللى فى يوم قلبه انشبك


واللى انقطع منه الشبك


واللى فى عز البرد قام يصطاد سمك


صاده السمك


واللى حلم بشطوط بعيده


ضاع فى سكتها العنيده


واتهلك


واللى رسم عَ الرمل قلب


واللى انجرح ومالوهْشْ ذنب


واللى فِضِلْ ع الشط واقف


نفسه ينزل ..


بس خايف


واللى بحَّر بالسفينه


واللى نفسه يلاقى مينا


واللى قضَّى العمر كله


جوا أسوار المدينه


ياااااااااهْ يا بحر ..!


لسه ياما دموع كتير


حتصُب فيكْ


حتى أمطار الشتا


دى دموع ألم


مكبوته فى عيون السما..


سالت على خد الفضا


ونزلت عليكْ


أيووووهْ يا بحر ..!


السنين مرت وفاتت


وإنت شايل كل ده فْ قلبك


وساكت ..!


ييجى صيف


يرحل خريف


وإنت قلبك برضه من جواه نضيف


ييجى الربيع


أحزان تموت


يمشى الربيع


أحلام تضيع


ييجى الشتا


تلقى القلوب ملفوفه فى تْياب الدفا ..


متكلفته


وعيون ورا الشبابيك


تلملم ذكريات متشتته


تسرح تتوه ويا الفضا


تلمح جناحه وهو مفرود ع المدى


يحرس قلوع الصيادين


تبقى القلوب ويا العيون


ويا الأماكن كلها


وقت الشتا ..


نورس حزينْ .

النهارده حلمت بيكى


النهارده حلمت بيكى


حلم صافى بلون عنيكى


حلم من عمر الصِّبا



لما كان الحب أخضرْ


كل يوم قُدَّامنا يكبرْ


والأمانى قريبه



وفْ شوارع ذكرياتنا


إفتكرتْ سنين حياتنا


والليالى الطيِّبه


لمَّا قلب الليل ندانا


واتولد مشوار هوانا


واتقسَمْنا لبعضنا



القمر كان هو جارنا


والنجوم سِكْنِتْ فى دارنا


والسهر نام عندنا



والنسيم لو فات علينا


يبتسم .. تضحك عنينا


والدموع تِفرحْ لنا


وامََّّّا ليل الحزن يِقْسى


نحضن الأحلام وننسى


كل خوفنا وهَمِّنا



كنا دايما نستخَبَّى


جُوَّا بعض وننسى حَبَّه


من عذابنا وجرحنا



وامَّا كان ييجى الغروبْ


كُنَّا نحلم بالهروبْ


وَّيَّا شمسْ تضُمِنا


كنْتْ فاكر حلمى ماتْ


ويَّا عمر الذكرياتْ


والمشاعر والحنينْ



كنت بحسب إنه راحْ


واندفن ويَّا الجراحْ


والمواجع والأنينْ




والنهارده رجعت أحلم


حلم من عمر الصِّبا


وافتكرت سنين حياتنا


والليالى الطيبه

إتأخرت عليكى ..؟


إتأخرتْ عليكى ..؟

كنت بَلِم نجوم السما علشان أعملهم عُقْدْ ..

عقد يليق بأرق ملاكْ ..

وبأحلى بشر فى الأرضْ ..

واتغربت فْ قلب الكونْ ..

مليون نجمه بمليون لونْ ..

ما لْقيتْ نجمه تساوى عنيكى ..

إتأخرتْ عليكى ..؟
*****
كنت بجيبلك صُحبة وردْ ..

ورغم البردْ ..

رُحْتْ جناينْ ..

زُرْتْ مداينْ ..

واتعذبتْ فْ ليل الشَّردْ .

ما لْقِيتْ ورده ف كل الدنيا ..

تستاهل تلمِسْها إيديكى ..

إتأخرتْ عليكى ..؟
*****
كنتْ بحاول ألاقى هديه ..

تليقْ بملاكى .

حاجه تساوى الحب ف قلبى ..

إللى إتمناكى .

بس إحترتْ ..

واما لقيتْ نفسى إتأخرتْ ..

قلت أجيلك من غير عقدْ ..

ومن غير وردْ ..

أصلِكْ أغلى نجوم السما ..

وأرقْ زهورْ الأرضْ ..

* بحبك *

بحبك بس يا خساره


بحبك بس يا خساره
سنين الجرح دواره
وانا ياما جرحت قلوب
وجه دورى
ألاقى الجرح فى سطورى
نصيب مكتوب
وبعد عنادى وغرورى
أسلم قلبى وشعورى
وابات مغلوب
على اديكى
واكون راضى
واقول يمكن ده ذنب قلوب
جرحت شعورها فى الماضى
وفى عنيكى
أشوف الحب بينادى
بصوت هادى
كأنه سكون
أطير جواه ..
يتوهنى ..
فى قلب الكون
كأنه سحاب
كأنه سراب
كأنه جنون
واشوفك فى السما هايمه
وفوق موج البحور عايمه
فى أحضان الزهور نايمه
كأن الكون ده مخلوقلك
وامد ايديا فوق غصنك
بقلب حنون
وأحلم أرتمى ف حضنك
واحرر قلبك المسجون
أمد ايديا واتمنى
أعيش وياكى فى الجنه
وأبعت روحى تستنى
وترجع روحى محتاره
بحبك بس يا خساره

"""""""""
بحبك بس سكتنا
رميتنا ف قلب غربتنا
وليلنا حزين
وأيامنا
خديتنا ف عز أحلامنا
لبحر أنين
سابيتنا لموج يغرقنا
لقلب البحر يسرقنا
يكسر نبض أشواقنا
ويقتل فينا أحلى سنين
ونرحل من حنين لحنين
ونصبح فى الدروب ذكرى
لحب حزين
وتتفرق خطاوينا
وتتعذب أمانينا
ويبكى الدمع فى عنينا
ومش عارفين
حتنسانا الدموع ولا
حنفضل فى الدموع عايشين
ويصرخ حبنا فينا
كفايه جراح
تعبت خلاص ومش قادر
سيبونى أموت عشان ارتاح
وأرجع تانى أتمنى
أعيش وياكى فى الجنه
وأبعت روحى تستنى
وترجع روحى محتاره
بحبك بس يا خساره
سنين الجرح دواره
سنين تطول
وليل أطول
وألف غروب
ولا قادر أوصّلك
ولا قادر أنا اوصلك
وابات مغلوب
على أديكى
واكون راضى
وأقول يمكن ده ذنب قلوب
جرحت شعورها فى الماضى


موجة بحر


بحب موجة بحر

مصاحبها من صغرى

يوم ما التقيت بالبحر

كان عمرها عمرى



الموجه دى شافت

لعبى ونا صغيَّر

قلبى البرىء واقف

ع الشط متحير

يحلم بحضن البحر

تلمح عيونه الصخر

يهرب قوام حلمه

وبسرعه يتغير

ماشيه السنين بتمر

والموجه واخدانى

تكبر ليالى العمر

وألاقيها عايشانى

وتفوت سنين أكتر

حلم الصبا يكبر

وف ملحها السكر

داب الزمان المر



الموجه دى شافت

أول مقابلة حب

من غير قلوع شالت

حلمين جمعهم قلب

ولقينا تالتنا

ومشينا سكتنا

الخطوه فى الخطوه

والجنب جنب الجنب


وف يوم حزين باكى

غدر الزمان بينا

واقف فى شبَّاكى

باصص على المينا

ع البعد شفت شراع

فارد قلوعه وداع

بيقول تالتكم باع

ورجعنا وحدينا


ورجعت والموجه

تحضنى من تانى

وفْ ملحها السكر

دوبت أحزانى .

دلوقت لازم نفترق


دِلْوقْتْ لازِمْ نِفتِرِِقْ مِنْ غيرْ كلامْ

منْ غيرْ ما نِخْضعْ لِلمواجِعْ والآلامْ

منْ غيرْ ما أضُمِّكْ .. أوْ أقَرَّبْ حتَّى منِّكْ

مَعَ إنِّى يامَا حْلِمْتْ عَلى إيدِكْ أنامْ



دِلْوقْتْ لازمْ نِفتِرِقْ رغمْ الحنينْ

وبرغمْ أحلامْ الليالى المجْروحينْ

مكتوبْ علينا .. نُخْنُقْ الفَرحه بإيدِينا

وتْضيعْ حياتْنا فْ قَلْبْ مِشْوارْنا الحزينْ



دِلْوقْتْ لازمْ نِفتِرِقْ منْ غيرْ دُمُوعْ

مِنْ غيرْ ما نِحْلمْ أوْ نِفَكَّرْ فى الرُّجوعْ

مِنْ غيرْ ما نِحْكى .. مُشْ حَنِلْحقْ حتَّى نِبْكِى

الوقتْ فاتْ والْبحرْ بيْنادى القُلوعْ



دِلْوقْتْ لازمْ نِفْتِرِقْ مِنْ غيرْ وَداعْ

وِبْدَمِّى حكْتِبْلِك بَحِبِّكْ عَ الشِّراعْ

حَرْسِمْ عِنيكِى .. وْقلْبْ مَدْبوحْ بينْ إيدِيكى

بِيْقولْ لقلبِكْ يومْ ما سِيبْتَكْ عُمْرى ضاعْ .

ديفيدى العرب


دى فى دى العربْ

ده مش مجرد منتدى

ولا حلم ف قلوبنا إبتدى

ده حقيقه وسط العتمه طلتْ

نوْرها واصل للمدى

جمَّع قلوبْ ..

رغم الحواجز والدروبْ ..

لبسها توبْ

ٍوحدة وطنْ .

والكلمه زى البرقْ ..

تخرج من ضلوع الشرقْ ..

تقراها عيون الغربْ ..

يحضنها الجنوبْ .

تطرح خَضاْر ٍوسط الحروبْ ..

توصل لأبعْد ٍم الزمنْ .

أفكارنا تجْمعنا ..

وأوهامنا ..

تودعنا ..

وكل الأرض تسمعنا ..

ويصبح للحياه معنى ..

ونتخطى المحنْ .

إيه رأيكم نعمل علَمْ واحد

يرفرف فى السما..؟

أبيض بلون الحبْ ..

لون الطهرْ ..

لون قلب الوطنْ .

ونغنى غنوة حب واحده ْمنغمَه ..

تعزفنا أوتارها ..

ومعانيها ..

بلون النصر نختارها ..

وصوت الفرح يبقى جوابها وقرارها

وينسانا الشجنْ .

إيه رأيكم ..

لو يوم نلاقى المنتدى ..

بقى مش مجرد منتدى ..؟

ولا حلم فٍ ْقلوبنا إبتدى ..؟

يبقى منارٍةْ ٍوحده وسطْ العتمه طلِّت ..

نورها واصل للمدى .

إيه رأيكم ..؟!

شارك هذا على...

* Facebook
* Twitter
* البريد

شبكات إضافية

* Delicious
* Mixx
* Google Buzz
* Blogger
* Digg
* Stumble Upon
* Tumblr
* Reddit
* Yahoo! Bookmarks
* Google Bookmarks
* MySpace
*


شارك هذا عن طريق البريد الإلكتروني...